COTABATO City – Binawian na ng buhay ang isang barangay chairwoman habang nilalapatan ng lunas sa pagamutan sanhi ng mga tama ng bala sa katawan makaraang tambangan ng hindi kilalang mga suspek nitong Enero 28 sa lungsod na ito.
Kinilala ang biktimang si Bai Ella Biruar ng Barangay Bagua Mother, Cotabato City habang ligtas na ang mga sugatang sina Jasmin Samson at Princess Odin.
Matatandaan, nitong Enero 28, bandang alas:12:30 ng tanghali nang tambangan ang biktima at mga kasama nito habang lulan ng sasakyan sa harap ng San Roque Chapel, Purok Manday MB Bagua ng naturang lungsod.
Napag-alaman, katatapos lamang kumain ng mga biktima sa Southseas Mall at pauwi sa kanilang bahay nang mangyari ang insidente.
Dinala sa ospital ang mga biktima para lapatan ng lunas ngunit makalipas ang isang linggo ay namatay si Biruar.
Nagpapatuloy ang imbestigasyon ng pulisya para alamin ang pagkakakilanlan sa mga suspek at motibo sa krimen. (ANNIE PINEDA)
